Яшел Үзән лицее “Мин татарча сөйләшәм” Республика акциясендә җиңү яулады

Бастырып чыгару өчен

27 Апрель 2011,11:02

Мондый акция республикада инде алтынчы тапкыр үткәрелә

(Казан, 27 апрель, «Татар-информ»). Яшел Үзәннең 1 нче лицее “Мин татарча сөйләшәм” Республика акциясендә абсолют җиңүче дип табылды.
Мондый акция республикада инде алтынчы тапкыр үткәрелә. Яшел Үзән әлеге чарада ел саен катнашса да, моңрчы беркайчан да югары нәтиҗәләргә ирешмәгән иде. 26 апрель көнне Казанда акциягә нәтиҗәләр ясалды. 1 нче лицейга Татарстан Республикасы мәктәпләре арасында беренче урын бирелде.
Татар теле һәм әдәбияты укытучыларының, милли мәгариф мәсьәләләре буенча директор урынбасары, районда акциянең координаторы һәм оештыручысы Венера Дәүләтшинаның инициатива күрсәтүе һәм оешканлыгы Яшел Үзәнне җиңүгә китерде. Яшел Үзәннең 10 нчы гимназиясе 3 нче урынга лаек булды.
28 апрельдә татар теле һәм әдәбияты укытучылары Бөтенроссия форумында җиңүчеләр акцияне үткәрү тәҗрибәсен тәкъдим итәчәк. Форум К.Тинчурин исемендәге Татар дәүләт драма һәм комедия театры бинасында уза, дип хәбәр итә Яшел Үзән муниципаль район Советы матбугат хезмәте.

Чыганак: Татар - информ мәгълүмат агентлыгы